माथेरान ट्रेन सज्ज
नव्या पर्यटन हंगामासाठी नेरळ - माथेरान मिनी ट्रेन सज्ज झाली आहे . ब्रेक पोर्टरविना नॅरोगेजवर धावू शकेल अशी एअरब्रेक सिस्टिम कार्यान्वित करण्यात येणारे मिनी ट्रेनचे सहा डबे नेरळ लोको शेडमध्ये दाखल झाले आहेत . विशेष म्हणजे तंत्रज्ञांनी या मिनी ट्रेनचे डबे दार्जिंलिंग , सिमला , कुलु - मनाली , कालकाच्या धर्तीवर कुर्डुवाडी येथील वर्कशॉपमध्ये तयार केले आहेत .
१५ जून ते १५ ऑक्टोबर या कालावधीत नॅरोगेजवर धावणारी मिनी ट्रेन पावसाळ्यातील अतिवृष्टीच्या शक्यतेमुळे बंद असते . या कालावधीत मिनी ट्रेनचे डबे दुरुस्त करणे , इंजिन दुरुस्त करणे , नॅरोगेज मार्गांची किरकोळ दुरुस्ती अशी कामे केली जातात . मिनी ट्रेनचे डबे या विश्रांतीच्या कालावधीत कुर्डुवाडी येथील वर्कशॉपमध्ये दुरुस्तीसाठी नेवून ऑक्टोबरच्या पहिल्या आठवड्यात पुन्हा आणले जातात . या वर्षी हे डबे सप्टेंबर २०११ मध्ये कुर्डुवाडीला नेले आहेत . १९ ऑक्टोबरपासून ही मिनी ट्रेन पुन्हा धावणार आहे .
